Antonio Conte është i bindur se Interi është në rrugën e duhur, përkundër humbjes nga Real Madridi në Ligën e Kampionëve.

Nerazzurrët u kthyen nga disavantazhi prej dy golash për ta barazuar rezultatin, mirëpo Los Blancos realizuan edhe një herë për ta fituar sfidën.

“Ky është Interi im, edhe i mirë edhe i keq. Mendoj se këto hapa janë të nevojshëm për t’u rritur dhe nuk e di sa skuadra kanë ardhur këtu në Madrid dhe kanë zhvilluar këtë lloj futbolli, që nga 2-0 me dy gola të dhuruar, të kthehen në lojë dhe të kenë shanse të fitojnë 3-2”.

“E pranuam golin e tretë dhe rezultati nuk ua jep djemve atë që e merituan për përpjekjet e tyre, por dëshmon se detajet mund ta ndryshojnë lojën”.

“Real Madridi e quajti finale, prandaj dha maksimumin, ishin të përqendruar, të vendosur dhe morën rezultat të rëndësishëm”, ka deklaruar Conte për Sky Sport Italia. /Telegrafi/