Chelsea nuk ka arritur më shumë se një barazim 1-1 në udhëtim te Nottingham Forest, në kuadër të xhiros së 18-të në Ligën Premier.

Ka qenë një ndeshje e baraspeshuar me dy fytyra, ku në pjesën e parë dominuan mysafirët dhe në të dytën vendasit.

Ishte minuta e 16-të e ndeshjes, kur Raheem Sterling realizoi për t’i kaluar londinezët në epërsi 0-1.

Deri në fund të pjesës së parë Chelsea e ruajti mirë epërsinë, përkundër që vendasit bën përpjekje për ta barazuar rezultatin.

Kësisoj 45 minutat e para përfunduan me epërsinë minimale të Chelseat 0-1.

Në pjesën e dytë vendasit patën më shumë nga loja dhe gjetën edhe golin e barazimit.

Boly asistoi bukur te Serge Aurier i cili barazoi shifrat në 1-1 kur kishin kaluar një orë lojë.

Deri në fund lojtarët e Chelseat krijuan edhe disa raste të mira shënimi, por pa arritur të gjenin golin e fitores dhe sfida u mbyll baras 1-1.

Pas këtij barazimi Chelsea mbetet në vendin e tetë në tabelë me 25 pikë, derisa Nottingham është në vendin e 18 me 14 pikë.