Disfata 0-3 kundër Bayernit në Champions krijoi zhgënjim të madh në mesin e tifozëve të Barçës. Por më keq se rezultati ishte imazhi i ofruar nga një ekip i frikësuar, që nuk gjuajti qoftë një herë në portën e Manuel Neuerit.

Kanë kaluar gjashtë ditë, kohë e mjaftueshme për “entuziastët”, që të pranojnë realitetin e hidhur, që Ronald Koeman dhe Gerard Piqué e “përqafuan” pas asaj humbjeje: “kjo është ajo që ekziston”.

Është një moment i vështirë dhe i tensionuar, sepse problemet financiare të klubit kushtëzojnë gjithçka. Dhe në atë kontekst, Barcelona duhet të reagojë ndaj Granadas, sot, në “Camp Nou”, në orën 21:00. Duhet të fitojë dhe të bindë me lojën e saj për të qetësuar atmosferën. Është detyrim, nuk ka opsion tjetër.

Do të jetë rikthimi i Barçës në kampionat, 22 ditë pas triumfit kundër Getafes (2-1). Na atë ndeshje, Griezmann dhe Emerson ishin pjesë e “blaugranava”, lojtarë tashmë të larguar, por do të mungojë edhe Braithwaite, i operuar në gju. Në dispozicion të Koemanit nuk janë Ansu Fati, Dembele dhe Aguero, madje as Pedri dhe Jordi Alba, që kanë shfaqur problem fizike. I sapombërrituri Luuk de Jong dhe Coutinho janë të gatshëm për të dhënë kontribut që nga minuta e parë.