KB Vëllaznimi përmes një njoftimi në Facebook ka konfirmuar përleshjen e dy basketbollistëve të vet para përballjes me Golden Eagle Yllit,  ndeshje e vlefshme për çerekfinalen e Superkupës së Kosovës.

Kluba nga Gjakova nuk i ka bërë të ditur emrat e basketbollistëve, mirëpo ka thënë se tanimë janë marrë masa, shkruan arbresh.info.

Komunikata e plotë:

KOMUNIKATË

KB Vëllaznimi njofton tifozët “Kuqezinjët e Jakovës” dhe të gjithë adhuruesit e klubit se klubi i qytetit ka adresuar zhvillimet e fundit dhe konform rregullave të klubit ka marrë masa ndaj lojtarëve të përfshirë që kanë thyer kodin disiplinor dhe të sjelljes sportive.

KB Vëllaznimi dënon rastin në fjalë dhe është i vendosur të luftojë që rastet e tilla të shëmtuara të qëndrojnë larg nga sporti.

KB Vëllaznimi siguron adhuruesit se klubi është i fokusuar vetëm në ndeshjen e radhës dhe shkon me motiv të lartë në Suharekë për duelin çerekfinal të Superkupës ndaj nikoqirit, KB Golden Eagle Ylli./arbresh.info/