Disa orë pas vrasjes me thikë në lagjen numër 3 të Kavajës, Policia arriti të vërë në pranga 48-vjeçarin L.P, i njohur edhe me mbiemrin Derjai, si autori i ngjarjes.

Ai qëndroi i fshehur në rrethinat e Kavajës dhe, pas negociatave me familjarët e tij, vendosi të vetëdorëzohej.

Menjëherë pasi u shoqërua nga autoritetet, 48-vjeçari tregoi edhe vendin ku kishte fshehur thikën me të cilën goditi disa herë viktimën Skerdilajd Isufi.

Përmes një njoftimi zyrtar, Policia thotë se ngjarja është pasojë e një konflikti banal, i ndodhur mes tyre rreth orës 14:00 të së shtunës, teksa burime konfirmojnë se përplasja nisi për parkimin e një makine.

Isufi kishte parkuar automjetin përpara banesës së shtetasit L.P. Ky i fundit doli nga banesa dhe i kërkoi atij të largojë makinën, çka solli nisjen e një konflikti fillimisht verbal mes tyre.

Pas ngjarjes, autori u largua nga banesa për të qëndruar disa orë në kërkim, deri në momentin kur u lokalizua dhe u vu në pranga nga Policia, e cila e referoi atë në prokurori për akuzën e vrasjes./TvKlan.al