Në ambientet e Kolegjit Profesional të Formimit Policor në Akademinë e Sigurisë, u zhvilluan veprime praktike nga kursantët duke improvizuar rënien e një zjarri në objekt shumëkatësh.

Gjatë këtyre veprimeve u testua shpejtësia e daljes së kursantëve dhe personelit nga ambientet e godinës, por u praktikuan dhe modulet teorike të mësuara më parë për bashkëveprimet e koordinimin e strukturave të policisë, me ato të mbrojtjes kundër zjarrit dhe emergjencave shëndetësore në raste të tilla.

Ky testim u zhvillua mbi bazën e një plani të detajuar dhe u monitorua/filmua për tu analizuar gjatë procesit mësimor mbi veprimet e kryera, anët pozitive dhe të metat e konstatuara.

Këto prova emergjence dhe praktikat masive profesionale janë kërkesë e vijueshmërisë së procesit riakreditues 2027-2030 të Kolegjit Profesional të Formimit Policor në Akademinë e Sigurisë.

Stafi i Akademisë së Sigurisë mbetet i përkushtuar që të bashkërendojë informacionet teorike me veprimet praktike, që kursantët të pajisen me informacion dhe njohuri praktike./atsh.al