Rama nga Kuçova: Gjergj Kastrioti e përcaktoi fatin tonë të lidhur me Perëndimin dhe jo më Lindjen

17:40 | 1 Maj 2025
E.H

Kryetari i Partisë Socialiste, Edi Rama këtë të enjte është ndalur në një takim elektoral në qytetin e Kuçovës.

Edi Rama sërish theksoi se Shqipëria duhet të futet në BE dhe të mos e humbasë më trenin e historisë, e sipas tij këtë mund ta bëjë vetëm PS.

“Nga mandati ynë i katërt, ky qytet dhe Shqipëria ka nevojë për diçka, anëtarësimin e vendin në BE. Po ua them shumë drejtpërdrejt, këto zgjedhje dhe ky mandat nuk është për mua, për karrigen time, për shumicën tonë të thjeshtë, është për shumë më tepër sesa kaq. Arsyeja se përse u them se PS i duhet mandat i katërt, është sepse bëhet fjalë për të përmbushur një mision historik, që zanafillën e ka të profecia e heroit tonë Kombëtar, Gjergj Kastrioti, që e përcaktoi fatin tonë të lidhur me Perëndimin dhe jo më Lindjen”, tha Rama.