Policia e Durrësit liron 3 hapësira plazhi, sekuestron 70 çadra dhe shezlongë të paligjshëm

13:04 | 19 Qershor 2025
E.K

Policia e Durrësit ka vazhduar edhe këtë të enjte kontrollet përgjatë vijës bregdetare, në kuadër të operacionit “Plazhi i lirë”, me qëllim lirimin e hapësirave publike të zëna në mënyrë të paligjshme.

Sipas njoftimit nga policia sot u liruan tre hapësira në plazhin e Kallmit, ku tre shtetas nga Durrësi kishin vendosur rreth 70 komplete me çadra dhe shezlongë pa leje.

Për këta persona, identifikuar si A.H., 61 vjeç, E.S., 36 vjeç dhe F.H., 64 vjeçe, të tre banues në Durrës, është nisur procedimi në gjendje të lirë, ndërsa janë sekuestruar çadrat dhe shezlongët.

Në njoftimin e Policisë thuhet se kontrollet do të vijojnë në të gjithë vijën bregdetare, me qëllim që hapësirat publike t’u lirohen pushuesve dhe të verifikohen aktivitetet e subjekteve gjatë sezonit veror./Arbresh.info