Përfaqësuesit e opozitës protestojnë ditën e sotme para Bashkisë së Tiranës. Gjatë tubimit, protestuesit kanë djegur goma automjetesh. Në këto momente, policia ka ndërhyrë për të fikur zjarrin, por pa sukses pasi protestuesit kanë vijuar djegien e gomave. Gjithashtu janë hedhur herë pas here vezë në drejtim të godinës së Bashkisë Tiranë.

Të martën e shkuar, protestuesit nuk u përplasën me forcat e policisë dhe nuk hoqën gardhin metalik si në protestat e shkuara, por shtuan hedhjen e molotovëve. Në këtë protestë jo vetëm jeta e policëve, por molotovët vunë në rrezik jetët e gazetarëve, operatorëve dhe qytetarëve të tjerë.

Herët e kaluara, protestuesit hodhën sende dhe ushqime në fasadën e bashkisë, si dhe kanë përdorur molotov dhe flakadanë.

Protestat e përjavshme të opozitës para bashkisë nisën pas arrestimeve të disa prej drejtuesve më të lartë të këtij institucioni për të cilët SPAK thotë se kanë konsumuar veprat penale të korrupsionit dhe shpërdorimit të detyrës. /tvklan.al