Porti i Durrësit, këtë sezon veror, ka qenë porta e dytë hyrëse pas Aeroportit Ndërkombëtar “Nënë Tereza”, i cili ka përballuar një fluks të lartë pasagjerësh që janë futur në vendin tonë.

Përveç emigrantëve që jetojnë dhe punojnë në Itali dhe në vendet e tjera të BE-së, nga Porti i Durrësit janë futur edhe një pjesë e konsiderueshme turistësh që kanë zgjedhur Shqipërinë për pushime.

Muaji korrik, në gjysmën e parë të tij, shënoi fluksin më të lartë të hyrjeve nga Porti i Durrësit, ndërsa në gjysmën e dytë ky fluks është kthyer në dalje, si nga emigrantët ashtu edhe nga turistët.

Të dhënat e Autoritetit Portual tregojnë një qëndrueshmëri të lartë të fluksit të udhëtarëve, me shifra pothuajse të njëjta me një vit më parë. Diferenca është minimale: rreth 1% më pak ose 1,981 pasagjerë më pak gjatë korrikut të këtij viti.

Terminali i trageteve ka operuar me kapacitet të plotë, ndërsa siguria portuale, policia kufitare dhe dogana kanë qenë të angazhuara edhe për parandalimin e tentativave për veprime të kundërligjshme ndërkufitare. (A2 Televizion)