Personi në foto është 45-vjeçari Çajup Selimi, biznesmeni që u qëllua për vdekje me pistoletë në lagjen “15 shtatori” të qytetit të Tepelenës.

Rezulton që viktima të jetë pronar i një biznesi shumice, dhe në të shkuarën ka pasur konflikte për shkak të konkurrencës në tregti.

Pas plumbave të marrë në trup, Selimi u dërgua menjëherë në Spitalin Rajonal të Gjirokastrës, por nuk mundi t’u mbijetonte plagëve.

Nuk dihet ende identiteti i autorit si dhe as rrethanat në të cilat ka ndodhur ngjarja. Megjithatë vlejnë për t’u përmendur konfliktet që ka pasur viktima në të shkuarën.

Në vitin 2018 Selimi u përlesh me dy persona, të cilët e goditën e atë me mjete të forta. Asokohe familjarët e tij do të deklaronin se ai ishte sulmuar edhe 4 herë të tjera.

Për ngjarjen në vitin 2018 u ndalua Risiano Abedini, po nga Tepelena. Megjithatë mbetet e paqartë nëse ngjarja e sotme ka lidhje me atë të ndodhur tri vite më parë.

Çajup Selimi rezulton biznesmen në fushën e tregtimit të miellit me pakicë. Në ekstraktin e QKB-së thuhet se Selimi tregtonte edhe materiale ndërtimi, dhe artikuj të ndryshëm.

Njoftimi i Policisë

Rreth orës 21:15 në qytetin Tepelenës, në lagjen “15 Shtatori”, në rrethana ende të paqarta është plagosur me armë zjarri shtetasi Ç.S., rreth 45 vjeç, i cili ka humbur jetën në Spitalin Rajonal Gjirokastër si pasojë e plagëve të marra.

Menjëherë shërbimet e Komisariatit të Policisë Tepelenë dhe Forcat Shqiponja të DVP Gjirokastër kanë shkuar në vendngjarje dhe po krehin zonën për kapjen e autorit.

Ndërkohë janë ngritur disa pika kontrolli në hyrje dhe dalje të qytetit Tepelenë. Grupi hetimor nën drejtimin e Prokurorisë ndodhet në vendngjarje dhe po punon për identifikimin dhe kapjen e autorit/ve./Panorama/