Ish- nënkryetarja e Kuvendit të Shqipërisë, Jozefina Topalli, ka reaguar sot në lidhje me kërkesën e policisë holandeze për kthimin e vizave për shqiptarët, duke thënë se përgjegjës kryesor për këtë është kryeministri i Shqipërisë Edi Rama.

Ajo në një postim në Facebook kërkesën e policisë holandeze për kthimin e vizave për shtetasit shqiptar e quan lajm të zi.

Postimi i plotë:

Policia Holandeze kërkon kthimin e vizave për shqiptarët.

Sot në të gjitha mediat është shpërndarë lajmi i kërkesës së Policisë Holandeze për kthim të vizave për shqiptarët.

Ky lajm vjen brenda një muaji, kur Franca tërhoqi vëmendjen dhe thirri Ministrin e jashtëm Shqiptar për të njëjtën çështje.

Kur në parlament kam paralajmëruar se rritja e krimit dhe trafiqeve të drogës mund të rrezikojë lëvizjen e lirë, i forti i Tiranës përmes ministrit të tij të jashtëm e përjashtoi me nënqeshje.

Sot liria e lëvizjes është më e kërcënuar, dhe kjo do ishte “colpo di grazia” për një vend në dëshpërim, ku 56% e popullsisë duan të ikin, sepse nuk shohin perspektivë në tokën e tyre. Heqja e vizave ishte një ndër arritjet më të mëdha të kohës. Ishte ëndrra e një populli të izoluar në dekada.

Lajmi për rrezikun e kthimit të regjimit të vizave është i zi. Përgjegjësia për këtë kërcënim serioz ka përgjegjës vetë PM Rama, që ka hyrë në histori si i forti i Tiranës, që drogën e bëri politikë ekonomike të tij.