Juglindja e vendit është përfshirë nga reshje të dendura të dëborës gjatë orëve të fundit. Në qarkun e Korçës trashësia e saj shkon nga 5-10 cm në qytet dhe deri 15-30 cm në zonat malore duke bërë që disa fshatra si Panariti dhe Lekasi të mbeten të izoluar.

Nga bora janë bllokuar gjithashtu disa fshatra në zonat e thella malore të Pogradecit. Në qarkun e Dibrës ka patur reshje bore dhe temperatura të ulëta deri në -10 gradë.

Kjo ka bërë që aksi Peshkopi-Kukës, Peshkopi-Qafë Draj, Ura e Çerenecit-Steblevë dhe Qafë Buall –Krastë të kalohen vetëm me zinxhirë.

Në Bulqizë ka patur probleme në rrugët e brendshme të qytetit , ndërkohë me vështirësi kalohet në njësitë Krastë, Tërnovë dhe në fshatrat e zonës së Gollobordës.

Në rrethin e Matit ka patur reshje bore por nuk ka pasur probleme, ndërsa në fshatrat përreth mund të shkohet vetëm me zinxhirë./klan