Një turist gjerman, rreth 75 vjeç, ka ndërruar jetë paraditen e sotme gjatë një vizite në sitin arkeologjik të Kalasë së Butrintit, në jug të Shqipërisë.

Sipas informacioneve paraprake të Policisë së Sarandës, shkak i vdekjes ka qenë një problem shëndetësor natyral. Po shqyrtohet mundësia e një ataku kardiak i shkaktuar nga temperaturat e larta.

Ngjarja ka ndodhur teksa turisti po vizitonte zonën historike, e cila është një nga destinacionet më të frekuentuara turistike në vend. Menjëherë pas njoftimit, në vendngjarje kanë mbërritur shërbimet e Policisë dhe grupi hetimor, të cilët po punojnë për dokumentimin e plotë të rrethanave të rastit.

Autoritetet shqiptare janë në kontakt me Ambasadën Gjermane në Tiranë për ndjekjen e procedurave të mëtejshme në lidhje me 75-vjeçarin./euronews.al