Prokuroria e Elbasanit ka nisur hetimet pas rastit në Gramsh ku disa fëmijë në kopshtin numër 1 dyshohet se janë helmuar nga ushqimi me salmonelë.

“Specialistët për Hetimin e Krimit në Komisariatin e Policisë Gramsh referuan materialet procedurale në Prokurorinë pranë Gjykatës së Shkallës së Parë të Juridiksionit të Përgjithshëm Elbasan, për vlerësim, pasi më datë 24.05.2025 është marrë dijeni nga rrjetet sociale se në Kopshtin Nr.1 Gramsh janë helmuar nga salmonela disa nga fëmijët e këtij kopshti”, njofton policia.

Policia njofton se në spital janë paraqitur për ndihmë mjekësore gjashtë fëmijë. Ndërkohë që të gjithë fëmijët e kopshtit u janë nënshtruar analizave mjekësore. Janë bllokuar gjithashtu kartelat klinike të gjashtë fëmijëve të shtruar në spital dhe janë bllokuar produktet ushqimore të mbetura në kuzhinën e kopshtit.

“Në spitalin e Gramshit janë paraqitur për të marrë ndihmë mjekësore 6 fëmijë dhe janë bërë analizat për të gjithë fëmijët dhe personelin e këtij kopshti. Në cilësinë e provës materiale janë sekuestruar Kartelat Klinike për 6 pacientët e shtruar në spitalin e Gramshit, janë sekuestruar Procesverbalet e kontrollit dhe furnizimit me produkte ushqimore të Kopshtit Nr.1, si dhe janë marre mostrat nga ushqimi për ekzaminime të mëtejshme në kushte laboratorike. Gjithashtu, është bërë dhe bllokimi i produkteve ushqimore të mbetura në kuzhinën e këtij kopshti. Të gjitha veprimet janë kryer nën drejtimin e Prokurorisë së Juridiksionit të Përgjithshëm Elbasan”, njoftojnë më tej uniforma blu./abcnews.al