Me tone të ashpra nga çadra ku prej 6 ditësh po proteston së bashku me militantë të djathtë dhe deputetë të opozitës, ish kryeministri Sali Berisdha nuk ka kursyer as sot akuzat e rënda nga eurodeputetit Knut Flenkestein, i cili një ditë më parë i bëri thirrje për dialog politik dhe lënien mënjanë të ‘përrallave me Soros’.

Berisha i kujtoi eurodeputetit se reforma në drejtësi u tentua të manipulohej nga Edi Rama dhe Soros me pjesën e përkthimit, teksa shkoi edhe më tej duke thënë se kushtetuta u shndërrua një prostitutë. “Flinkestein tha se Berisha po tregon përralla me Soros. Unë kam një këshillë për të: nëse Soros ka besim te ty, ti mos ki besim te Soros dhe kjo do të shërbejë gjithë jetën.

Në këtë ndërtesë krahas kryemafiozit është edhe mafiozi i ardhur nga Italia, sekretari i përgjithshëm i mafies shtetërore. Kushtetuta përcakton që marrëveshjet ndërkombëtare miratohen nga Parlamenti. i them mikut tim (Flenkestein), çfarë bënë? Falsifikimin e turpshëm nëpërmjet përkthimit. Filloi menjëherë operacioni duke e shndërruar kushtetutën e Shqipërisë njëherë në kushtetutë, njëherë, të më falin zonjat dhe zonjushat, e shndërruan në prostitutë siç u intereson atyre. i bëj thirrje Parlamentit Europian të hetojnë këto akte të shëmtuara falsifikimesh. Në këtë mënyrë nuk bëhet reformë por punohet për destabilizimin e vendit”, tha Berisha.