3 muaj paraburgim ka caktuar gjykata e Solothurnit ndaj italianit që dyshohet se vrau të hënën kosovarin Arben Gashi në banesën e tij në Winznau të Zvicrës.

Mediat zvicerane, tri ditë pas ngjarjes kanë zbuluar se personi që u vra të hënën në Zvicër është kosovari Arben Gashi nga fshati Nekoc i Drenasit.

Portali “20 Minuten” që ka publikuar të dhënat rreth vrasjes është bazuar në rrëfimin e babit të viktimës dhënë një ditë më parë për Gazetën Express, bashkë me të dhënat e viktimës.

Tutje, për të njëjtin portal, Prokuroria e Solothurnit ka konfirmuar identitetin e viktimës.

“Viktima është Arben G. nga Kosova. Mosha, motivi dhe sekuenca tjera të ngjarjes janë çështje e hetimit”, citohet të ketë deklaruar zëdhënësi i kësaj prokurorie Jan Lindenpütz.

I njëjti për këtë portal ka njoftuar se ndaj të dyshuarit për vrasjen e kosovarit Gjykata ka caktuar masën e paraburgimit për tre muaj, përcjell në shqip Gazeta Express.

Të hënën, 32 vjeçari Arben Gashi mbeti i vrarë nga tre plumbat që iu shkrepen në trup nga një i dyshuar italian në komunën e Winznaut, të kantonit gjermanishtfolës të Solothurnit.

Kosovari, nga Nekoci i Drenasit, mendohet të jetë viktimë e gabimit të vrasësit nga Italia, i cili kërkonte një serb për të larë disa hesape të një problemi që kishin mes vete, kohë më parë.

Vrasësi, Italiani 38 vjeçar, i arrestuar nga policia helvete, ka pranuar krimin e kryer më 4 korrik.

Babai Ibish Gashi thotë se nuk ka shumë informacione për të birin. Por, vetëm e di se i është vrarë nga një italian dhe se vrasja ka ndodhur gabimisht.

Arben Gashi, sipas familjarëve, kishte rreth 4 vite që jetonte në vendet gjermano folëse, Gjermani e Zvicër. Të njëjtit pohojnë se, i ndjeri në Kosovë ka qenë para dy muajsh.