Shkaku i urisë së shpeshtë nuk është gjithmonë te ushqimi, por shpesh te mënyra si e trajtoni trupin tuaj

Shumë njerëz e kanë përjetuar atë ndjesinë e urisë që kthehet shumë shpejt, edhe pse sapo kanë ngrënë një vakt të bollshëm. Nëse kjo ndodh rregullisht, duhet ta merrni si një paralajmërim se trupi juaj nuk po merr atë që i nevojitet ose se rutina juaj e përditshme nuk është e balancuar. Sipas nutricionistes Caroll Mareto, ky fenomen lidhet si me mënyrën se si ushqehemi, ashtu edhe me mënyrën se si kujdesemi për trupin në përgjithësi.

Një nga shkaqet kryesore është mungesa e lëndëve ushqyese. Nëse në ushqim nuk ka mjaftueshëm proteina, fibra, vitamina ose yndyrna të shëndetshme, trupi nuk merr sinjalin e ngopjes dhe vazhdon të kërkojë ushqim. Një pjatë e pasur me karbohidrate të rafinuara, si buka e bardhë, ëmbëlsirat apo pijet e gazuara, rrit shpejt nivelin e sheqerit në gjak, por ky nivel bie po aq shpejt, duke sjellë përsëri ndjesinë e urisë. Mungesa e yndyrnave të mira, si ato që gjenden te arrat, farat, avokado apo vaji i ullirit, është një tjetër arsye pse nuk ndiheni të ngopur.

Një faktor tjetër i rëndësishëm është dehidratimi. Truri shpesh e ngatërron etjen me uri, prandaj ndodh që të ndiheni të uritur kur në fakt keni nevojë vetëm për ujë. Ekspertët rekomandojnë të pini të paktën 1.5 deri në 2 litra ujë në ditë, duke filluar që në mëngjes me një gotë ujë para kafesë.

Po ashtu, gjumi i pamjaftueshëm dhe stresi ndikojnë në hormonet që rregullojnë urinë. Kur jemi të lodhur ose të tensionuar, niveli i grelinës (hormoni i urisë) rritet, ndërsa leptina (hormoni i ngopjes) bie, duke na bërë të kërkojmë më shumë ushqim sesa kemi realisht nevojë. Edhe shëndeti i zorrëve luan rol: mikrobiota e dobët, pra mungesa e baktereve të mira, lidhet me tretje joefikase dhe me ndjesinë e urisë që rikthehet shpesh, transmeton Telegrafi.

Çfarë mund të bëjmë?

Nutricionistët këshillojnë të hamë me vetëdije, pa nxitim dhe pa shpërqendrime nga telefoni apo puna, në mënyrë që të kuptojmë më mirë sa dhe çfarë po konsumojmë. Dieta duhet të jetë e balancuar: të paktën gjysma e pjatës me perime dhe fruta të pasura me fibra, ndërsa pjesa tjetër me proteina cilësore si vezë, mish, peshk ose bishtajore. Yndyrnat e shëndetshme nuk duhet të mungojnë, sepse ato ndihmojnë të qëndrojmë të ngopur më gjatë.

Kujdesuni gjithashtu për rutinën e gjumit, duke siguruar të paktën gjashtë deri në shtatë orë pushim të mirëfilltë çdo natë, si dhe për menaxhimin e stresit me aktivitete relaksuese.

Në fund, kujtoni se uria e shpeshtë pas ngrënies nuk është gjithmonë vetëm çështje oreksi, por shpesh pasqyron mungesë të ekuilibrit në dietë, stil jete dhe kujdes për trupin. Nëse kjo gjendje përsëritet shpesh, është një sinjal që nuk duhet neglizhuar.