Kryeministri i Serbisë, Aleksandar Vuçiqi pasi që është nominuar nga partia e tij si kandidat për president të Serbisë, ka folur edhe për rajonin, e në veçanti për Kosovën.

Ai ka thënë se në Serbi e kanë kritikuar për dorështrengimin me ish presidentin e SHBA-ve, Bill Clinton.

“Sigurisht se ia kam shtrënguar dorën, dorën ia kam dhënë edhe Thaçit. A mendoni se me pëlqeu? Kjo është puna ime. Puna ime është që t’i shtrëngoj duart në mënyrë që Serbia mos të luftojë”, ka thënë Vuçiq, transmeton lajmi.net.

Duke folur në televizionin publik serb edhe për marrëdhëniet ndërmjet Kosovës dhe Serbisë, ka thënë se për herë të parë nuk ka kuptuar se çfarë ka ndodhur në bisedimet e Brukselit.

“Tomës (presidentit Nikoliq) i kam thënë kur kemi hyrë në aeroplan se jam shumë i frikësuar. Këtu jam njeriu më me së shumti përvojë, jam veteran sa i përket kësaj çështje, nuk mund të me frikësojnë me trike të thjeshta. Për herë të parë jam frikësuar, sepse nuk e kam kuptuar çfarë kanë bërë ata të BE-së dhe çfarë kanë bërë shqiptarët”, ka thënë ai.

Ai ka theksuar se “ka ardhur deri te karateja e përzier”, pasi që sipas tij, Isa Mustafa e ka humbur rolin e tij, kurse Kadri Veseli po rritet dhe fuqizohet, e kjo, siç ka thënë ai, është keq për Serbinë.

“E kam thënë të vërtetën pas atyre takimeve, askush nuk me ka demantuar. Jemi marrë vesh dhe hajde tash të bëhemi sikur nuk jemi marrë vesh. Luaj shah tërë jetën dhe nuk i kam kuptuar çfarë deshën dy herët e fundit. Kjo me frikëson dhe e kam një lloj ankthi”, ka thënë ai.