Një vajzë njëzet e njëvjeçare ka humbur jetën, ndërsa motra e saj më e madhe (22) po mjekohet në klinikat e Shkupit, pasi që janë helmuar me monoksid karboni në hapësirën në të cilën kanë fjetur në fshatin e Rekës së poshtme, Skudrinje.

Sipas informatave fillestare të policisë, ngjarja është paraqitur dje, pas çka ekipi i krim policisë ka dalë në terren dhe ka kryer ekspertizë.

Dy motrat, kanë fjetur në hapësirën ndihmëse të shtëpisë familjare, e cila është ngrohur me stufë me dru. Për prindërit ka qenë e dyshimtë që vajzat nuk ishin zgjuar ende dhe kanë hyrë në hapësirën, por ato kanë qenë pa vetëdije. Shumë shpejt u është ofruar ndihma në shtëpinë e shëndetit në Rostushë, e prej atje janë dërguar në Gostivar, por rrugës, vajza më e vogël, E.M. ka humbur jetën. Jetën e R.M. mjekët kanë arritur ta shpëtojnë.

Si ka ardhur deri te helmimi dhe cilat janë shkaqet e ngjarjes tragjike, do të konstatohet me hetimin të cilin e zhvillon prokurori publik nga prokuroria e Gostivarit.

Nga shkaqe ende të panjohura ka ardhur deri te helmimi me gaz helmues, sipas të gjitha gjasave monoksid karbon.