Qeveria malazeze dërgoi sot një karvan me pajisje mjekësore dhe ilaçe për të pësuarit e tërmetit në Shqipëri, raporton Anadolu Agency (AA).

Ministri i Shëndetësisë, Kenan Hrapoviç, shoqëroi karvanin me ambasadorin e Shqipërisë në Mal të Zi Ridi Kurtezi. Vlera e donacionit është 45.233 euro.

Hrapoviç tha se pas tërmetit në Durrës, qeveritë e Shqipërisë dhe Malit të Zi kanë qenë në kontakt të vazhdueshëm për të siguruar ndihmë për viktimat. Ai po ashtu tha se Ministria e Shëndetësisë u ka kërkuar kolegëve nga Mali i Zi ndihmë në sigurimin e pajisjeve dhe pajisjeve të caktuara mjekësore.

“Ministria e Shëndetësisë organizoi një aksion grumbullimi, ndërsa shpërndarësit e furnizimeve mjekësore, pajisjeve dhe ilaçeve treguan gatishmëri për të ndihmuar. Ndihma jonë këtu nuk do të përfundojë dhe si shtet do të ndihmojmë për t’i rregulluar pasojat e tërmetit”, theksoi Hrapoviç.

Ambasadori Kurtezi falënderoi Ministrinë e Shëndetësisë së Malit të Zi për ndihmën, si dhe të gjithë qytetarëve të këtij vendi për solidaritetin e treguar.

Kujtojmë se tërmeti i fuqishëm që goditi Shqipërinë më 26 nëntor, përveçse shkaktoi 51 persona të vdekur dhe mbi 900 të plagosur, shkaktoi edhe dëme të konsiderueshme materiale.