Në Maqedoninë e Veriut janë 3.500 bullgarë – kështu tha ministri i Jashtëm i vendit, Bujar Osmani, para Komisionit për Punë të Jashtme të Parlamentit Evropian. Eurodeputeti i GERB/ENP Andrej Kovaçev i kundërshtoi këto të dhëna para “TV Nova”. Eurodeputetët bullgarë ngritën sërish çështjen e bashkatdhetarëve të tyre në vend.

“Të gjitha burimet historike thonë se pjesa më e madhe etnike e Maqedonisë janë bullgarët. Nga origjina janë qindra mijëra, mbi 120-130 mijë me shtetësi bullgare”, tha Andrej Kovaçev, përcjell “Trud”.

“Duhet investuar shumë më tepër në tejkalimin e manifestimeve negative të rrënjosura ndaj atyre që deklarojnë hapur identitetin e tyre bullgar, ata duhet të integrohen. Tekstet shkollore duhet të ndryshohen. Është shumë e trishtueshme kur ndodh krejt e kundërta dhe prokuroria maqedonase i akuzon kryetarët e dy klubeve bullgare për nxitje të urrejtjes, dhe jo se i janë nënshtuar një gjëje të tillë. Ata nuk kanë mbrojtje”, shpjegoi Kovaçev.

“Osmani është një nga të paktët që shfaq dëshirën për ndryshim, por numri i bullgarëve që dalin nga regjistrimi janë trimat që, pavarësisht persekutimeve, u deklaruan për identitetin e tyre bullgar”, është kategorik Andrej Kovaçev./Telegrafi/