Gjykata e Apelit në Shkup ka shfuqizuar aktvendimin, gjegjësisht dënimin me burg prej një vit e gjysmë për ish pjesëtarin e Drejtorisë së Pestë, Goran Grujevski për lëndën “Fortesa” që nga 10 prilli, pra para 2 muajsh, përcjell Telegrafi Maqedoni.

Vendimi i gjykatës është publikuar në ueb faqen e Apelit më 18 maj, ditën kur Gjykata Supreme e Athinës refuzoi të pranojë kërkesën për ekstradim të Grujevskit dhe kolegut të tij, Nikolla Boshkoski. Por, publiku u informua për këtë më 31 maj, kur u publikua në media. Në Gjykatën Themelore Shkupi 1 edhe pas dy muaj nga vendimi i Gjykatës së Apelit nuk ka caktuar datë për proces të ri gjyqësor për këtë lëndë.

“Në rast kur ekstradimi është i mundshëm, duhet të pritet ekstradimi i të akuzuarit, ndërsa procesi gjyqësor mund të zhvillohet vetëm në rast se kërkesa për ekstradim refuzohet nga shteti ndaj të cilit është dorëzuar kërkesa për ekstradim”, thuhet në sqarimin e Gjykatës së Apelit./Telegrafi/