Në hulumtimin e fundit të Avokatit të Populli precizohet se 236 fëmijë janë regjistruar si lypës në rrugët e qyteteve te Maqedonisë. Fëmijët më të vegjël në rrugë kanë vetëm disa muaj, ndërsa më të mëdhenjtë edhe nga 18 vjet, njofton Zhurnal.

Pjesa dërmuese, gjegjësisht 228 janë romë, 5 turq, 2 maqedonas dhe 1 egjiptian. Këta fëmijë vijnë nga familjet e varfra ekonomikisht dhe brengosës është fakti që ata detyrohen të lypin nga vetë prindërit e tyre.

Avokati i popullit, Ixhet Mehmeti, thotë se për t’i mbrojtur këta fëmijë duhen marrë masa ndaj prindërve.

“Duhet të ndërmerren masa ndaj prindit i cili e keqpërdor të drejtën prindërore në mënyrë të vrazhdë, i shpërfillë detyrat prindërore në kuadër të të cilave është edhe detyrimi i fëmijëve që të lypin ose shfrytëzimi i tyre për lypje, detyrimi i fëmijëve për punë e cila nuk përkon me moshën e tij dhe ngjashëm”, deklaroi avokati i popullit, Ixhet Memeti.

Nga misioni i BE-së në Shkup thonë se do të vazhdojnë të ndihmojnë institucionet për të mbrojtur të drejtët e fëmijëve.

“Identifikacioni dhe sistemi social është i rëndësishëm që t’i shpjerë fëmijët nga rruga tek familjet e tyre dhe shkollat”, tha ambasadori i BE-së në Shkup, Aivo Orav.