Stilisti Brandon Maxwell rikthen fort xhinsin në koleksionin e tij pranverë 2018, prezantuar gjatë javës njujorkeze të modës.

Maxwell, i lindur në Teksas, e përdori këtë material për të parën herë në show-n e tij të mbushur me ngjyra të forta si e kuqja e thellë, blu-kobalti dhe e verdha e kanarinës.

Nën tingujt e këngës së Britney Spears, “Hit me baby one more time” dhe “Independent Women” nga Destiny’s Child’s, modelet sfiluan me xhinset e tyre me bel të lartë, bluzat e mbyllura prej shifoni dhe fustanet e derdhura.

Maxwell, i cili ka krijuar disa veshje për fanatiken e modës Lady Gaga, rreshton në listën e tij të klientëve emra të njohur si Michelle Obama, Uma Thurman dhe Gëyneth Paltrow, transmeton tch. Me koleksionin e pranverës 2018, ai iu largua preferencës së hershme për ngjyrën e zezë e atë të fildishtë, duke e spostuar vëmendjen tek një paletë ngjyrash të guximshme që përfshijnë rozën e fortë, jeshilen e smeraldtë dhe portokallinë.

Stilisti ia kushtoi spektaklin gjyshes së tij, Louise Johnson, e cila ndërroi jetë tani vonë, duke rrëfyer se ajo kishte punuar në një dyqan veshjesh të luksit dhe kishte frymëzuar karrierën e tij në fushën e modës.

Jashtë vëmendjes së 32-vjeçarit nuk ka mbetur dhe vendlindja e vet, Teksasi, e përballur me përmbytje masive pas kalimit të uraganit Harvey, ndaj biletat e këtij spektakli i nxori në ankand dhe fitimet vendosi t’ia dhurojë Bankës së Ushqimit në Hjuston.