Kryeministri i Republikës së Kosovës, Isa Mustafa, gjatë vizitës në Bruksel, u takua sot edhe me presidentin e Partive Popullore Evropiane (EPP), Joseph Daul.

Siç njofton komunikata, gjatë takimit, kryeministri Mustafa e ka njoftuar për progresin e Kosovës në proceset eurointegruese, me theks të veçantë në përmbushjen e të gjitha kritereve dhe rekomandimeve për liberalizimin e vizave për qytetarët e Kosovës.

Në këtë kontekst, kryeministri Mustafa, ka falënderuar për përkrahjen që EPP-ja dhe personalisht presidenti Daul kanë dhënë për Kosovën, duke qenë mbështetës të parezervë të liberalizimit të vizave, për MSA-në, për kosovarët, si një e drejtë e merituar.

Ndërsa, presidenti i EPP-së, Joseph Daul, ka vlerësuar progresin që po arrihet në Kosovë dhe përkushtimin e Qeverisë së Kosovës në proceset integruese evropiane.

Gjatë takimit, po ashtu, u bisedua për zhvillimet politike dhe proceset tjera në Kosovë.

“Përveç përkrahjes së deritashme, kryeministri Mustafa, ka kërkuar mbështetjen e mëtejme të EPP -së në Parlamentin e Evropian dhe në Këshillin Evropës, si dhe përkrahjen e Kosovës duke përfshirë lobimin te pesë vendet e mbetura të BE-së, të cilat përkundër mosnjohjes nuk i kanë penguar proceset eurointegruese”, thuhet në fund.