Ish-komandanti i NATO-s, gjenerali amerikan Wesley Clark, i njohur për udhëheqjen e fushatës 78-ditore të bombardimeve kundër Ish-Jugosllavisë në vitin 1999, është konfirmuar zyrtarisht si dëshmitar i mbrojtjes së ish-presidentit të Kosovës, Hashim Thaçit.

Clark do të japë dëshmi në mbrojtje të Thaçit në procesin gjyqësor që lidhet me akuzat e ngritura ndaj tij.

“Në përputhje me Urdhrin e Trupit Gjykues të 2 shtatorit 2025, mbrojtja e z. Hashim Thaçi njofton se është marrë miratimi nga qeveria e Shteteve të Bashkuara (“Ofruesi i Rregullit 107”), që autorizon deklaratën2 dhe dëshminë e dëshmitarit të saj të fundit, 1DË-007, Gjeneral Wesley Clark”, thuhet në njoftimin e gjykatës.

Fushata e drejtuar nga Clark detyroi ish-presidentin e Serbisë, Sllobodan Millosheviq, të tërhiqte forcat serbe nga Kosova në qershor 1999, duke mundësuar vendosjen e trupave të KFOR-it dhe kthimin e refugjatëve në vendbanimet e tyre./Arbresh.info