Gjykata Speciale ka realizuar një aksion në Kosovë, duke arrestuar ish-kryetarin e Malishevës, Isni Kilaj, Fadil Fazliun, vëllain e dy heronjve të Kosovës, Fazli dhe Bahri Fazliu, si dhe ish-shefin e Agjencisë Kosovare të Inteligjencës, Bashkim Smakaj.

Në një përgjigje për Arbresh.info, Zyra e Prokurorit të Specializuar (ZPS) ka konfirmuar se operacionet janë pjesë e një hetimi të vazhdueshëm që përqendrohet në vepra penale kundër administrimit të drejtësisë.

ZPS-ja ka theksuar se këto operacione janë të autorizuara nga Dhomat e Specializuara të Kosovës (DHSK) dhe mbështeten nga Misioni i Bashkimit Evropian për Sundimin e Ligjit në Kosovë (EULEX).

“Zyra e Prokurorit të Specializuar (ZPS) po kryen operacione në vazhdimësi në Kosovë në një proces hetimor që përqendrohet në vepra penale kundër administrimit të drejtësisë. Operacionet e ZPS-së janë autorizuar nga ana gjyqësore prej Dhomave të Specializuara të Kosovës (DHSK) dhe janë mbështetur nga Misioni i Bashkimit Evropian për Sundimin e Ligjit në Kosovë (EULEX)”, thuhet në përgjigjen e tyre./Arbresh.info