Një zjarr ka shpërthyer në pullazin e një ndërtese në Ferizaj, rreth mesnatës së së shtunës.

Zëdhënësi i policisë për rajonin e Ferizajt, Kanun Veseli, e ka konfirmuar lajmin për Arbresh.info, duke thënë se policia e NJRSh-së dhe ajo e rendit nga stacioni i Ferizajt kanë ndërhyrë menjëherë për të evakuuar të gjithë banorët e ndërtesës.

“Më datë 18.01.2025, rreth orës 01:10, kemi pranuar një informacion për një incident zjarri në një ndërtesë banimi, ku pullazi i saj ishte përfshirë nga flakët. Policia e NJRSH-së dhe policia e rendit nga stacioni i Ferizajt reaguan menjëherë, duke evakuuar të gjithë banorët. Pas tyre, zjarrfikësit mbërritën dhe arritën ta lokalizojnë zjarrin. Dëmet materiale janë të konsiderueshme, por fatmirësisht nuk është raportuar për të lënduar”, tha ai.

Veseli shtoi se Prokurori i Shtetit është njoftuar për incidentin dhe, nën autorizimin e tij, janë nisur hetimet për të zbuluar shkakun e zjarrit./Arbresh.info