Zëvendësministri i Shëndetësisë, Arsim Berisha mori pjesë sot në promovimin e Regjistrit zyrtar të barnave në Republikën e Kosovës, edicioni i 6-të, i cili është plotësuar me barnat e reja të regjistruara deri në tetor 2021 dhe përmban 3.540 produkte të mbrojtura dhe 889 produkte gjenerike.

“Regjistri i barnave përveç se do të ndihmojë komunitetin mjekësor në përgjithësi në Kosovë për të zbatuar praktikat më të mira të administrimit të barnave të regjistruara në Kosovë, është edhe një shembull i mirë i bashkëveprimit midis Odës së Farmacistëve, Agjencionit të Kosovës për Pajisje dhe Produkte Medicinale, Shoqatës së Farmacistëve dhe profesionistëve nga Fakulteti i Mjekësisë për të përditësuar të rejat sa u përket barnave të regjistruara në Republikën e Kosovës”, tha zëvendësministri Berisha.

Ai theksoi se promovimi i Regjistrit 6 të barnave do të ndihmojë në ngritjen e standardeve në fushën e farmacisë, ndërsa mjekët familjarë dhe specialistët e fushave të ndryshme do të kenë para vetes një pasqyrë të qartë të barnave të regjistruara, arbresh.info.

Kurse, kryetari i Odës së Farmacistëve të Kosovës, Arianit Jakupi tha se AKPPM-ja dhe OFK-ja do të shpërndajnë falas 1000 kopje për të gjithë farmacistët, mjekët familjarë dhe specialistët.

U.D. Kryeshefi i AKPPM-së, Arian Ahmeti theksoi se MSh-ja, AKPPM-ja, OFK-ja, Shoqata e farmacistëve dhe fakulteti i Mjekësisë do të punojnë për digjitalizimin e këtij regjistri.

Krahas Regjistrit të barnave 6, u promovua edhe Revista farmaceutike nr. 2 që nxirret nga së OFK-ja me tema të ndryshme nga kjo fushë.

Me mirënjohje për jetën dhe veprimtarinë e tij, post mortem, nga OFK është nderuar profesori i Farmakologjisë, Prof. Dr. Mentor Disha./arbresh.info/