Zëvendësministri i Punëve të Jashtme dhe Diasporës, Kreshnik Ahmeti, priti sot në një ceremoni zyrtare Gjeneralin Timothy Orr, mik i çmuar të Kosovës dhe përkrahës të partneritetit mes Kosovës dhe shtetit të Iowa-s, si dhe Kryetaren e qytetit të Johnston-it, Paula Dierenfeld.

Në fjalën e tij përshëndetëse, Ahmeti vlerësoi lart kontributin e Gjeneral Orr në forcimin e lidhjeve ndërmjet Kosovës dhe Iowa-s në fushën e bashkëpunimit ushtarak, arsimor dhe ndërinstitucional, duke theksuar se ky partneritet është shembull i miqësisë së qëndrueshme dhe bashkëpunimit të ndërsjellë.

Ai gjithashtu shprehu mirënjohjen për Kryetaren e qytetit të Johnston-it, znj. Dierenfeld, duke vënë në pah rolin e saj të rëndësishëm në nxitjen e bashkëpunimit në nivel lokal dhe ndërlidhjen mes komuniteteve.

Në fund të ceremonisë, Gjenerali Orr prezantoi dhuratat simbolike të përgatitura nga delegacioni i Iowa-s, si shenjë respekti dhe miqësie ndaj institucioneve të Kosovës.

“Ky takim dëshmon përkushtimin e ndërsjellë për thellimin e marrëdhënieve ndërmjet Kosovës dhe Iowa-s, si dhe vlerat e përbashkëta që ndajnë të dyja palët.”, u shpreh mes të tjerash ai./Arbresh.info/