Kryetari i AAK-së, Ramush Haradinaj ka prezantuar kandidaten më të re për deputete të kësaj partie, Zarife Asllanin.

Haradinaj ka thënë se me Zarifen Kuvendi i Kosovës, fiton një zë të fuqishëm që njeh sakrificën dhe nuk ndalet së luftuari për atë që beson.

Sipas kreut të AAK-së, prania e saj në parlament do të jetë një fitore për të gjithë qytetarët që aspirojnë për një shoqëri të shëndetshme dhe për një të ardhme më të mirë.

“Si aktiviste e hershme dhe e palodhur e Aleancës për Ardhmërinë e Kosovës, Zarifja ka qenë gjithmonë një shtyllë mbështetëse për organizatën dhe një zë për ndryshim. Ajo ka bashkuar me sukses aktivitetin politik me angazhimin e saj të paepur në luftën kundër kancerit të gjirit. Zarife Asllani nga Gjilani përfaqëson jo vetëm vlerat dhe parimet e Aleancës, por sjell edhe një shpirt të pathyeshëm, të gatshëm të luftojë për gratë e Kosovës dhe për një shoqëri më të shëndetshme. Ajo është dëshmi e asaj që mund të arrijë një grua kur i përkushtohet kauzës, familjes dhe vendit të saj”, shkroi Haradinaj./Arbresh.info/