Kryetari i Komunës së Obiliqit, Xhafer Gashi, bashkë me anëtarë e struktura të Këshillit Drejtues të Iniciativës Qytetare, sot, në një ceremoni solemne, ku i pranishëm ishte edhe kryetari i LDK-së, Lumir Abdixhiku, i është bashkuar edhe zyrtarisht Lidhjes Demokratike të Kosovës.

LDK përmes një njoftimi për media ka bërë të ditur se  kryetari i LDK-së, Lumir Abdixhiku, pasi që i uroi mirëseardhje kryetarit Gashi dhe bashkëpunëtorëve të tij, tha se kjo është një ditë e veçantë, të cilën e cilësoi si një ditë të rritjes, bashkimit dhe të vënies së themeleve të qëndrueshme të LDK-së në Obiliq, shkruan arbresh.info.

“Kjo ceremoni e sotme, në pjesëmarrje kaq masive, është vulë e fuqisë sonë politike, fuqi që buron nga bashkimi ynë ideologjik, nga nevoja për reforma të thella strukturore, si dhe nga vizioni që ndajmë për të ardhmen tonë politike, për Obiliqin e për Kosovën”, theksoi kryetari Abdixhiku.

Kryetari Abdixhiku e vlerësoi lart figurën e Xhafer Gashit, për të cilin tha se është patriot i madh, kryetar i suksesshëm i komunës, luftëtar i Koshares dhe mik i heronjve Agim Ramadani e Sali Çekaj.

Ndër të tjera, kryetari Abdixhiku, theksoi se bashkimi, rritja dhe hapja ndaj patriotëve si Xhafer Gashi e veprimtarëve të tjerë në të gjitha nivelet organizative të partisë është esenciale, si dhe bëri thirrje që këtij bashkimi t’i përgjigjen masivisht të rinj e të reja, burra e gra sepse Kosova e LDK-ja ka nevojë për ta, për kushtrimin e madh e ringritjen e madhe në zgjedhjet e ardhshme nacionale.

“Lidhja Demokratike e Kosovës është shtëpia jonë e përbashkët politike. Ta mbrojmë, ta ngrisim, ta lartësojmë drejt triumfeve të reja që na presin përpara”, tha në fund të fjalës së tij kryetari Abdixhiku.

Ndërsa, kryetari i komunës së Obiliqit, Xhafer Gashi, tha se ndihet i nderuar që bashkë me anëtarët e Këshillit Drejtues të Iniciativës Qytetare për Obiliqin, është bërë pjesë e LDK-së – partisë së themeluar nga Presidenti historik, Ibrahim Rugova.

“Reformat e ndërmarra dhe hapja e dyerve të partisë nga kryetari Abdixhiku, kanë bërë të mundur që ne sot të jemi pjesë e LDK-së dhe të rrugëtojmë së bashku”, nënvizoi Gashi./arbresh.info/