Kryeministri i Serbisë, Aleksandër Vuçiq, ka shkëmbyer sot qëndrimet me shefin e delegacionit të Bashkimit Evropian në Serbi, Michael Davenport, para vazhdimit të dialogut mes Prishtinës dhe Beogradit në Bruksel të hënën, si dhe ka theksuar përkushtimin e Qeverisë serbe drejt integrimeve evropiane si prioritet të politikës së jashtme.

Vuçiq ka theksuar se për Qeverinë serbe, i rëndësishëm është pajtimi thelbësor për Asociacionin e komunave me shumicë serbe në Kosovë, si pjesë e marrëveshjes së Brukselit, si dhe për telekomunikacionin, energjetikën dhe për “Parkun e Paqes” në Mitrovicë, por se ka shtuar se në dialog hyn për t’i mbrojtur interesat e Republikës së Serbisë, raportojnë mediat në Serbi.

Dy bashkëbiseduesit kanë diskutuar edhe për situatën në rajon, temë për të cilën Vuçiq, siç transmeton Koha.net, ka thënë se e gjithë puna e tij do të jetë e orientuar në politikën e pajtimit, të jetesës dhe punës së përbashkët në rajon.

Në këtë aspekt, Vuçiq ka thënë se propozimi i Britanisë së Madhe për paraqitjen e një Rezolute për Srebrenicën në OKB nuk i shpërben aspak këtyre qëllimeve, madje nxit edhe më tej tensionet nacionaliste dhe ndarjet e popujve në Ballkanin perëndimor.