Edhe një vit pas miratimit të tij në Kuvendin e Republikës së Kosovës, Ligji për çmimin e produkteve medicinale ende nuk po zbatohet.

Por, ministri i Shëndetësisë, Arben Vitia, sot gjatë raportimit në Komisionin për Shëndetësi dhe Mirëqenie Sociale, bëri të ditur se në tremujorin e fundit të këtij viti, ky ligj pritet të hyjë në fuqi.

Këtë deklaratë, ministri e bëri para deputetëve gjatë raportimit për listën zyrtare të çmimeve të produkteve medicinale, raporton Arbresh.info.

“Janë afatet ligjore kur pritet të hyj në fuqi ky ligj. Me respektimin e afateve, pas përfundimit të të gjitha proceseve të ankimimit, të kthimit të përgjigjeve që janë procese administrative, unë pres që në tre mujorin e fundit të këtij viti, qytetarët të kenë mundësi që t’i blejnë barnat bazuar në këtë ligj me çmime të lira, ashtu siç është fryma e këtij ligji”, tha ministri Vitia para anëtarëve të komisionit.

Sipas Vitisë, ky ligj pritet të rregullojë tregun farmaceutik në Republikën e Kosovës, duke mënjanuar shpenzimet e panevojshme dhe shpenzimet shtesë në kurriz të qytetarëve dhe institucioneve.

“Ky është një ligj që e përcakton çmimin tavan dhe e rregullon tregun farmaceutik në Republikën e Kosovës, për të mënjanuar shpenzimet e panevojshme dhe shpenzimet shtesë në kurriz të qytetarëve dhe institucioneve të Republikës. Dhe çdo njeri i cili do të marrë informacione se dikush brenda komisionit e pengon këtë proces, natyrisht që unë do të marr masa, do ta largojë dhe do ta zëvendësoj me dike tjetër”, u shpreh ministri Vitia.

Ndryshe, më 13 korrik 2023 Kuvendi i Kosovës ka miratuar Ligjin për çmimin e produkteve medicinale.

Ligji për çmimin e produkteve medicinale ka parashikuar metodologjinë e përcaktimi të çmimit të barnave, e cila bëhet nga komisioni i emëruar nga ministri, i përbërë nga 7 anëtarë.

Bazë e përcaktimit të çmimit është metodologjia e çmimeve referente të jashtme.

“Burimet e të dhënave në lidhje me çmimin me shumicë të produkteve medicinale janë publikimet e raporteve zyrtare më të reja të kohës, portali zyrtar në rrjet i institucioneve përgjegjëse zyrtare të këtyre shteteve referente: Shqipëri, Maqedoni e Veriut, Mali i Zi, Kroaci dhe vendi i origjinës” – thuhet në nenin 8.2 të këtij Ligji.

Ligji parasheh 4 lloje të çmimeve: çmimi me shumicë, çmimi me shumicë për produkte gjenerike, çmimi me pakicë dhe çmimi me pakicë për produkte gjenerike./Arbresh.info/