Qendra Kosovare për Studime të Sigurisë (QKSS) ka publikuar raportin “PERCEPTIMI I KOMUNITETIT SERB KUNDREJT POLICISË SË KOSOVËS: MIKE APO ARMIKE?”.

Integrimi i komuniteteve etnike, në veçanti i komunitetit serb, në Policinë e Kosovës, ka qenë një nga prioritetet kryesore të institucioneve të Kosovës dhe komunitetit ndërkombëtar, shkruan arbresh.info.

Shpat Balaj, Autor i Raportit, Qendra Kosovare për Studime të Sigurisë thotë se Kosova ka numër të kënaqshëm të përfaqësimit serb.

“12.2 për qind e policisë së Kosovës përbëhet nga komuniteti serbë. Megjithatë, përderisa Policia e Kosovës është institucioni më i besueshëm i sigurisë për pjesën tjetër të qytetarëve për komunitetin serbë është institucioni që gëzon më së paku besim. Vetëm 4.7 për qind e të anketuarve serbë i besojnë Policisë së Kosovës”, është shprehur Balaj, shkruan arbresh.info.

Procesi i integrimit filloi menjëherë pas luftës në Kosovë dhe gjatë viteve është përballur me shumë sfida, kryesisht për shkak të rezistencës së komunitetit serb të Kosovës për të njohur autoritetin e PK-së si pjesë legjitime e Shtetit të Kosovës.

Ky raport përmbledh gjendjen ekzistuese në lidhje me qëndrimin e komunitetit serb të Kosovës kundrejt PK-së në komunat me shumicë serbe, duke u fokusuar në katër komunat veriore të Kosovës. Punimi mbulon kontekstin e ngjarjeve dhe zhvillimeve kryesore, dhe e paraqet perceptimin publik kundrejt PK-së si rezultat të tensioneve politike në veri dhe gjendjes së përgjithshme të frikës në mesin e popullatës.

Përveç kësaj, punimi analizon shqetësimet kryesore të sigurisë të komunitetit serb të Kosovës, si dhe ofron disa rekomandime për adresimin e shqetësimeve dhe sfidave të tilla nga këndvështrimi i komunitetit.

QKSS zhvilloi gjashtë diskutime të ndara me qytetarë dhe përfaqësues të policisë në komunën e Mitrovicë të Veriut, Leposaviq, Zveçan, Zubin Potok, Graçanicë dhe Shtërpcë. Këto u pasuan nga intervista ballë për ballë me përfaqësuesit e qeverisë si dhe me shoqërinë civile. Ekipi bëri analizën e përmbajtjes së dokumenteve zyrtare, raporteve ekzistuese dhe shqyrtimeve të kornizave ligjore përkatëse.

Gjetjet e përgjithshme janë mbështetur edhe nga përfshirja e ekipit të QKSS në procese të ndryshme relevante, si dhe në konsultimet me aktorët përkatës./arbresh.info/