Kryetari i Kuvendit të Kosovës, Kadri Veseli, ka vizituar sot drejtuesit e Policisë së Kosovës, dhe i ka përgëzuar ata për punën profesionale të tyre në zbatimin e ligjit në Kosovë.

Veseli përmes facebook ndër të tjera ka thënë se duhet të punohet dhe më shumë që Kosova të jetë shembull i sundimit të ligjit, ku secili do trajtohej në mënyrë të barabartë, njofton Klan Kosova.

”Drejtuesit e Policisë së Kosovës i përgëzova sot për punën e jashtëzakonshme në zbatimin e ligjit në gjithë territorin e Kosovës dhe krijimin e një ambienti më të sigurt për qytetarët tanë. Duhet të punojmë edhe më shumë që Kosova të jetë shembull i sundimit të ligjit, ku secili trajtohet në mënyrë të barabartë dhe të jemi të pakompromis në luftën kundër krimit dhe korrupsionit”.

Veç saj kryeparlamentari Veseli njëherit lider i Partisë Demokratike, ka bërë të ditur se pensionimi i parakohshëm dhe sigurimi jetësor i policëve janë çështje të cilat do adresohen shpejt.

”Diskutuam edhe për kërkesat që pjesëtarët e Policisë së Kosovës kanë për pensionimin e parakohshëm, sigurimin jetësor dhe sigurimin shëndetësor. Këto janë tri segmente tejet të rëndësishme për këtë institucion dhe ne do t’i adresojmë shumë shpejt ato”, njofton Klan Kosova.