Kryetari i Kuvendit të Kosovës, Kadri Veseli ka falënderuar Parlamentin Evropian për miratimin e propozimit për liberalizimin e vizave nga Komisioni për Politikë të Jashtme.

Ai përmes një postimi në rrjetin social Facebook ka njoftuar për një bisedë telefonike që ka pasur sot me raportuesen për Kosovë, Tanja Fajon, me të cilën ka biseduar për përmbylljen më të shpejt të procesit të liberalizimit të vizave.

Veseli ka thënë se kjo është një vazhdimësi e mbështetjes së PE në rrugëtimin e Kosovës drejt Bashkimit Evropian.

Lexoni postimin e plotë të Veselit në Facebook:

Sot pata një bisedë telefonike me Znj. Tanja Fajon, raportuese për liberalizimin e vizave për Kosovën në Parlamentin Evropian, lidhur me përmbylljen sa më të shpejtë të procesit të liberalizimit të vizave dhe çështjet të cilat kërkojnë përkushtim institucional në raport me këtë proces. Unë e përsërita qëndrimin tim që ky proces duhet të përfundojë sa më shpejtë, i sigurt që interesat e qytetarëve të Kosovës do të mbizotërojnë mbi agjendat tjera.

Znj. Fajon përsëriti gatishmërinë e saj për të ndihmuar në ballafaqimin me sfidat që janë para nesh. Shfrytëzova rastin të falënderojë Parlamentin Evropian për miratimin e propozimit për liberalizimin e vizave nga Komisioni për Politikë të Jashtme.

Kjo është një vazhdimësi e mbështetjes së Parlamentit Evropian në rrugëtimin e Kosovës drejt BE-së dhe inkurajim për institucionet e Kosovës. Parlamenti Evropian mbetet aleat yni dhe do të vazhdojmë përkushtimin për realizimin e planit tonë të përbashkët. K.V.