Gjykata Themelore në Ferizaj, Departamenti i Përgjithshëm – Divizioni Penal, ka caktuar masën e paraburgimit prej një muaji ndaj të pandehurit A.N., i cili dyshohet se ka kanosur një gjyqtar të kësaj gjykate gjatë ushtrimit të detyrës zyrtare.

Sipas njoftimit të gjykatës, kërkesa për caktimin e masës së paraburgimit është bërë nga Prokuroria Themelore në Ferizaj, ndërsa pas mbajtjes së seancës dëgjimore dhe shqyrtimit të provave, gjyqtarja e procedurës paraprake, Hakile Ilazi, e ka aprovuar kërkesën si të bazuar.

“Pas mbajtjes së seancës dëgjimore dhe analizimit të shkresave të lëndës, gjyqtarja e procedurës paraprake në Departamentin e Përgjithshëm – Divizioni Penal, Hakile Ilazi, ka vlerësuar se ekziston dyshimi i bazuar se më datë 3 nëntor 2025, rreth orës 09:00 në Ferizaj, përkatësisht në objektin e Gjykatës Themelore në Ferizaj, i pandehuri me dashje, me qëllim të frikësimit dhe shkaktimit të ankthit, ka kanosur seriozisht me fjalë se do t`i shkaktoj ndonjë të keqe personit zyrtar – të dëmtuarit I.B., në lidhje me pozitën e tij zyrtare si gjyqtar në Gjykatën Themelore në Ferizaj, në atë mënyrë që pasi që kishte refuzuar pranimin e aktgjykimit, me anë të së cilës është shpallur fajtor dhe gjykuar, kërkon takim me gjyqtarin në zyre dhe pasi që nuk pranohet, në prani të stafit mbështetës të gjykatës: K.L., A.Sh., Sh.R., Sh.H., dhe praktikantëve R.S., dhe E.K., me sjellje të vrazhdë, në shenjë revolte dhe me tonë të lartë kanos me fjalë se: “Veç mos e zafsha në udhë qat I.”, dhe fjalë tjera ofenduese, me ç`rast si pasojë e këtyre fjalëve dhe veprimeve tek i dëmtuari ka shkaktuar shqetësim dhe pasiguri”, thuhet në njoftim./Arbresh.info