Kryetari i Nismës Socialdemokratike, Fatmir Limaj ka ngushëlluar familjen Bukoshi për ndarjen nga jeta të ish-kryeministrit të Kosovës në ekzil, Bujar Bukoshi.

Me anë të një postimi në Facebook, ai tha se Bukoshi ishte një figurë historike që i shërbeu kauzës kombëtare në rrethana të jashtëzakonshme, me përkushtim dhe përgjegjësi, shkruan Arbresh.info.

“Me pikëllim të thellë mora lajmin për ndarjen nga jeta të Dr. Bujar Bukoshit, ish-Kryeministër i Republikës së Kosovës në ekzil. Dr. Bukoshi ishte një figurë historike që i shërbeu kauzës kombëtare në rrethana të jashtëzakonshme, me përkushtim dhe përgjegjësi. Si mjek, politikan dhe udhëheqës i Qeverisë në ekzil, ai dha kontribut të çmuar për organizimin dhe mbështetjen e lëvizjes sonë për liri dhe pavarësi.”, u shpreh ai.

“Emri i tij mbetet i lidhur ngushtë me periudhën më të rëndë të përpjekjes për shtetësi të Kosovës dhe me përkrahjen për strukturat organizative që e mbanin gjallë shpresën e popullit tonë. Ngushëllimet më të sinqerta familjes Bukoshi, miqve, bashkëpunëtorëve dhe gjithë qytetarëve të Kosovës.”, shtoi tutje ai.

“Qoftë i përjetshëm kujtimi për veprën e Dr. Bujar Bukoshit!”, tha ai.

Dr. Bujar Bukoshi ishte një nga figurat më të rëndësishme politike të Kosovës gjatë viteve ’90-të dhe ish-kryeministër i Qeverisë së Kosovës në ekzil.

Ai po vuante prej kohësh nga një sëmundje e rëndë.

Dr. Bujar Bukoshi ishte mjek dhe politikan shqiptar nga Kosova.

Lindi në vitin 1947 në Suharekë. Shkollën fillore e kreu në Suharekë, gjimnazin në Prizren më 1964.

Studimet e mjekësisë i kreu pranë Universitetit të Beogradit në janar të vitit 1971. Specializoi nga urologjia ne Prishtinë dhe Beograd më 1977. Si bursist i DAAD-së (Shërbimit Gjerman për Shkëmbim Akademik) ishte në përsosje profesionale si mjek në Klinikën Urologjike të Spitalit Kemperhof në Koblenz, Gjermani. Më 1984 u përzgjodh bursist i Senatit të Berlinit për Familje dhe Çështje Sociale dhe nga 1984-1985 punoi si mjek në Klinikën Urologjike të Klinikës Steglitz të Freie Universität Berlin (Universiteti i Lirë i Berlinit Perëndimor), ku u mor me hulumtime dhe më 1985 mbrojti doktoraturën mbi një temë të onkologjisë urologjike (“Cistektomia radikale në kuadrin e trajtimit të karcinomës së fshikëzës së urinës dhe komplikimet e saj“)./Arbresh.info/

LEXO EDHE:

Vdes Bujar Bukoshi