Vajza e Enver Malokut kërkon votimin e Speciales

16:25 | 26 Qershor 2015
M. A.

Deputetja e LDK-së Doruntina Maloku ka thënë se nuk ka nevojë as të pastrohet as gjykohet lufta e UÇK-së sepse po të kërkohej një gjë të tillë do të gjykoheshin edhe vendet aleate që i ndihmuan Kosovës.

“Ne sot po vendosim për themelimin e Gjykatës atë që të gjithë ne dështuam ta bëjmë.

Dështuam t’ mbrojmë viktimat dhe dëshmitarët. Dështuam të kryejmë proceset gjyqësore, lëndët që po myken nëpër sirtaret e gjykatave”, ka thënë Maloku.

Deputetja Maloku e ka përmendur edhe vrasjen e babait të saj në vitin 1999 dhe atë të Xhemail Mustafës i cili u vra pas luftës, vrasje këto që nuk u ndriçuan asnjëherë.

“Ju si po thirreni si qytetarë të ndershëm të Kosovës sa herë keni kërkuar drejtësi për këta”, tha Maloku.

“Pse po i frikësoheni kaq shumë drejtësisë”, u ka thënë Maloku atyre që po e kundërshtojnë themelimin e Speciales.