UNMIK-u ka reaguar lidhur me zhvillimet e fundit në Kosovë duke bërë thirrje që çështjet e pazgjidhura të diskutohen brenda kornizës së dialogut Kosovë-Serbi.

Po ashtu, është shprehur shqetësim për vendimin e BQK-së për qarkullimin e vetëm një valute – euro – për pagesa në Kosovë, shkruan Arbresh.info.

Sipas njoftimit, zhvillimet e fundit ndikojnë në të drejtat ekonomike dhe sociale të serbëve të Kosovës dhe komuniteteve të tjera joshumicë.

“Përfaqësuesja Speciale e Sekretarit të Përgjithshëm (PSSP) dhe Shefja e UNMIK-ut Caroline Ziadeh ka ndjekur me shqetësim serioz zhvillimet e fundit që ndikojnë në të drejtat ekonomike dhe sociale të serbëve të Kosovës dhe komuniteteve të tjera joshumicë.”, thuhet në njoftim.

“PSSP Ziadeh bën thirrje që çështjet e pazgjidhura të diskutohen brenda kornizës së Dialogut të lehtësuar nga BE-ja, duke përfshirë kohën e duhur për të lejuar komunikim efektiv dhe kontakt adekuat me komunitetet e prekura paraprakisht.”, thuhet ndër të tjera në njoftim.

Ziadeh ka ritheksuar përkushtimin e palëkundur të UNMIK-ut për respektimin dhe mbrojtjen e të drejtave të njeriut për të gjitha komunitetet, duke përfshirë parimin e barazisë dhe mosdiskriminimit, i cili është një nga shtyllat e kornizës së të drejtave të njeriut në Kosovë./Arbresh.info/