U prezantua rrejshëm si pjesëtar i FSK-së, arrestohet i dyshuari në Obiliq

10:24 | 13 Dhjetor 2025
R J

Policia e Kosovës ka arrestuar dje, rreth orës 18:20, në fshatin Mazgit të Obiliqit një person të dyshuar për veprat penale armëmbajtje pa leje dhe prezantim të rremë si person zyrtar.

Sipas njoftimit zyrtar, i dyshuari ishte duke drejtuar një veturë me targa vendore kur u ndalua nga njësiti policor. Gjatë kontrollit, policia i ka gjetur dhe konfiskuar një pistoletë me tetë fishekë.

I dyshuari është prezantuar si person zyrtar, duke pretenduar se është pjesëtar i Forcës së Sigurisë së Kosovës (FSK), mirëpo pas verifikimeve është konstatuar se i njëjti nuk është pjesëtar i FSK-së.

Bëhet e ditur se pas intervistimit, me urdhër të prokurorit kompetent, i dyshuari është liruar dhe rasti do të trajtohet në procedurë të rregullt.