Gjykata Supreme e Kosovës ka refuzuar kërkesën e gjyqtarit të Gjykatës së Apelit, Driton Muharremi, i cili është degraduar nga pozita e gjyqtarit të Apelit në gjyqtar të Gjykatës Themelore në Prishtinë/

Kolegji i Gjykatës Supreme e ka refuzuar si të pathemeltë ankesën e gjyqtarit të Gjykatës së Apelit të Kosovës, Driton Muharremi, të ushtruar kundër vendimit të Këshillit Gjyqësor të Kosovës, për shkak të shqiptimit të masës disiplinore, “Transferim i përhershëm në Gjykatën Themelore në Prishtinë-Departamenti i Përgjithshëm”, raporton arbresh.info.

“Kolegji i Gjykatës Supreme në seancën e mbajtur me datë 20 dhjetor 2021 ka vlerësuar se qëndrimi dhe përfundimi juridik i KGJK-së, është i drejtë dhe i ligjshëm, dhe se masa disiplinore e shqiptuar është proporcionale me shkeljen e konsumuar”, njofton Gjykata Supreme.

Gjykata Supreme bënë të ditur se përmes vendimit të saj AA nr. 85/2021 konsideron se është zbatuar procedura e paraparë sipas ligjit në fuqi dhe masa e dhënë është në përputhje me parimin e proporcionalitetit duke marrë parasysh: seriozitetin e shkeljeve disiplinore të kryera nga gjyqtari, pasojat e shkeljes disiplinore dhe rrethanat në të cilat është kryer shkelja disiplinore./arbresh.info/