Gjykata Themelore e Prishtinës sot ka dënuar me tri vjet burg Arsim Krasniqin pasi që më 5 gusht të këtij viti në një aksident trafiku ka shkelë një fëmijë ku edhe ka gjetur vdekjen.

Më 5 gusht të këtij viti rreth orës 14:30, Arsim Krasniqi në fshatin Breznicë, të komunës së Obiliqit, përkatësisht në udhëkryqin e rrugëve “Dalip Maloku”, “Hoxhë Breznica” me rrugët dytësore “Shahiqi” dhe “Nezir Muli”, nuk ka treguar kujdes ndaj këmbësorëve në vendbanim ashtu që përderisa drejtonte automjetin e tipit “BMW 328”, me të arritur te udhëkryqi i lartcekur, me kohë nuk i vëren dy këmbësorë fëmijë të cilët ishin duke e kaluar rrugën me ç’rast me pjesën e përparme të automjetit e godet këmbësorin tani të ndjerin Florian Hashani dhe e bartë me automjet, ku pas goditjes në ato momente nga kahja e kundërt ka lëvizur automjeti “Vw Kombi”, që e drejtonte Bekim Krasniqi, i cili me pjesën ballore të anës së djathtë goditet në automjetin BMË, duke mbetur në mes dy automjeteve këmbësori i ndjerë i cili sipas konstatimit të mjekut, ndërron jetë në vendin e ngjarjes.

Ndërkaq lëndime të lehta trupore pëson i pandehuri kurse pasagjerja e tij Mehreme Krasniqi dhe i dëmtuari Bekim Krasniqi, pësojnë lëndime të rënda trupore me pasoja të përkohshme në shëndet .

Ndaj të akuzuarit Arsim Krasniqi është vazhduar masa e paraburgimit deri në plotfuqishmërinë e aktgjykimit.