Marrëveshja e Stabilizim Asociimit (MSA) hyri në fuqi më 1 prill 2016. Por edhe tre vjet më pas ende nuk dihet a është zbatuar tërësisht kjo marrëveshje me Bashkimin Evropian.

Ministria e Integrimeve Evropian thotë se është e pamundur të dilet më një vlerësim të zbatimit të marrëveshjes, por se mund të vlerësohet niveli i zbatimit të Agjendës për Reforma Evropiane (ERA) dhe Programit Kombëtar për Zbatimin e MSA-së (PKZMSA) gjatë këtyre tre viteve, shkruan arbresh.info.

“MSA është marrëveshje ndërkombëtare, prandaj është e pamundur të dilet me një vlerësim të zbatimit të vet marrëveshjes. Në vend të kësaj, mund të vlerësohet niveli i zbatimit të Agjendës për Reforma Evropiane (ERA) dhe Programit Kombëtar për Zbatimin e MSA-së (PKZMSA) gjatë këtyre tre viteve.”, thuhet në përgjigjen e MIE.

Tutje kjo ministri ka treguar se sa i përket ERA-s, 50 për qind e saj është zbatuar plotësisht e 50% e tyre janë në zbatim e sipër.

“Sa i përket ERA-s, e cila përmban 22 prioritete politike, të gjeturat e raportit mbi zbatimin e këtij dokumenti gjatë periudhës nga fillimi i nëntorit 2016 deri në fund të janarit 2019 tregojnë se janë zbatuar plotësisht 11 nga 22 prioritete, ose 50% e tyre, ndërsa 11 prioritete, ose 50% e tyre, janë në zbatim e sipër. Më tej, niveli i zbatimit të planit të veprimit të ERA-s gjatë të njëjtës periudhë është 71.11%, pasi që 96 nga 135 veprime janë zbatuar plotësisht, ndërsa 39 prej tyre (28.89%) janë në zbatim e sipër.

Në anën tjetër, niveli i zbatimit të PKZMSA-së gjatë këtyre tre viteve është si në vijim:

• 2016 – 55.46%, ose 762 nga 1,374 masa afatshkurtra të planifikuara;
• 2017 – 62.05%, ose 600 nga 967 masa afatshkurtra të planifikuara; dhe
• 2018: 68.23%, ose 363 nga 532 masa afatshkurtra të planifikuara”, thotë MIE.

Si përfitime të Kosovës nga kjo marrëveshje, Ministria e Integrimeve numëron marrëveshjet rajonale të nënshkruara, rritjen e eksporteve, rritjen e investimeve si dhe rritjen e të hyrave tatimore në buxhetin e Kosovës.

“• Janë nënshkruar dhe janë në fuqi mbi 131 marrëveshje rajonale për bashkëpunim që përfshijë fusha të ndryshme;

• Rritja e eksportit të produkteve kosovare: 2016: 309,627,000 euro; 2017: 378,010,000 euro, 2018: 367,255,000 euro;
• Rritja e eksportit të produkteve të Kosovës për në tregun e BE-së: 2016 – 70,060,710 euro, 2017 – 94,227,880 euro, 2018 – 103,406,780 euro;
• Rritja e investimeve të huaja: 2016: 220 milionë euro, 2017: 255.4 milionë euro, 2018: 231.7 milionë euro;
• Rritja e vëllimit të të hyrave tatimore për buxhetin shtetëror: 2016 – 8.61% më shumë të se vitin 2015; 2017 – 5.33% më shumë të hyra se në vitin 2016; 2018 – 8.05% më shumë të hyra se në vitin 2017;
• Rritja e numrit të bizneseve të reja të regjistruara: 2016: 10,424 biznese të reja; 2017: 9,223 biznese të reja; 2018: 9,805 biznese të reja;
• Raporti i Bankës Botërore për Të Bërit Biznes 2018, i publikuar me 31 tetor 2017, konfirmon progresin e konsiderueshëm në përmirësimin e mjedisit afarist duke rritur rangimin e Kosovës në vendin e 40-të në botë, nga gjithsej 190 shtete. Gjithashtu, Kosova është i vetmi shtet Evropian në radhët e 10 shteteve më të reformuara gjatë kësaj periudhe të raportimit;
• Anëtarësimi në 4 Programe të BE-së: COSME, nga i cili përfitojnë bizneset e vogla dhe të mesme; Erasmus+, nga i cili përfitojnë universitetet dhe organizatat hulumtuese shkencore; Evropa Kreative, nga i cili përfitojnë organizatat e kulturës; dhe Evropa për Qytetarët, nga i cili përfitojnë organizatat e shoqërisë civile dhe autoritetet lokale;”.

Kujtojmë se Marrëveshja për Stabilizim-Asociim është nënshkruar në qeverinë e Isa Mustafës, si dhe nga Ministri i atëhershëm i Integrimeve Evropiane të Kosovës, Bekim Çollaku dhe Johannes Hahn, komisioner i BE-së për Politika të Fqinjësisë Evropiane dhe Negociata të Zgjerimit./arbresh.info/