Tre persona janë raportuar të zhdukur brenda 24 orëve të fundit.

Të tre janë të mitur, thuhet në raportin e policisë, ndërkaq njëri rast është raportuar në Prizren e dy në Vushtrri.

Një nënë në Prizren ka raportuar në polici se nuk e di vendndodhjen e djalit që nga 21 nëntori.

Policia ka filluar hetimin.

“Ankuesja femër kosovare, ka raportuar se djali i saj i mitur ka dalë nga shtëpia dhe nuk dihet asgjë për vendndodhjen e tij. Rasti nën hetime”, thuhet në raportin e PK-së.

Një nënë tjetër e ka raportuar si të zhdukur nga 4 dhjetori djalin e saj në Vushtrri.

“Ankuesja kosovare, ka raportuar se djali i saj i mitur, ka dalë nga shtëpia dhe nuk dihet asgjë për vendndodhjen e tij. Rasti nën hetime”, njoftoi PK.

E, në fshatin Kollë të Vushtrrisë më 5 dhjetor babai ka raportuar se nuk e di ku gjendet vajza e tij.

“Ankuesi kosovar, ka raportuar se vajza e tij e mitur është larguar nga shtëpia dhe ende nuk dihet vendndodhja e saj. Rasti është duke u hetuar”.