Ministria e Kulturës, Rinisë dhe Sportit ka njoftuar se në kuadër të angazhimit për fuqizimin e bashkëpunimit ndërinstitucional dhe për të siguruar mbrojtjen e trashëgimisë sonë kulturore u themelua Grupi Koordinues Ndërinstitucional për Mbrojtjen e Trashëgimisë Kulturore.

Sipas njoftimit, ky grup ka për qëllim të hartojë dhe zbatojë masa konkrete që rrisin efikasitetin në mbrojtjen e monumenteve dhe trashëgimisë kulturore të Kosovës, shkruan Arbresh.info.

Grupi përbëhet prej 7 anëtarëve nga përfaqësuesit më të lartë të institucioneve tona:

Ministri i Kulturës, Hajrulla Çeku

Ministrja e Drejtësisë, Albulena Haxhiu

Ministri i Infrastrukturës, Liburn Aliu

Zëvendësministri i Punëve të Brendshme, Blerim Gashani

Përfaqësuesi i Këshillit Gjyqësor të Kosovës, Valon Totaj

Përfaqësuesja e Këshillit Prokurorial të Kosovës, Ariana Shajkovci

Përfaqësuesi i Policisë së Kosovës, Arbnesh Ajvazi

Në njoftimin për media thuhet se në takimet e rregullta që do të zhvillojë grupi koordinues, do të diskutohet dhe do të vendoset për hapat që do të ndërmerren për të siguruar që masat dhe politikat e mbrojtjes së trashëgimisë të jenë gjithmonë në përputhje me sfidat dhe nevojat aktuale./Arbresh.info/