Të shtëna në drejtim të një shtëpie në Vushtrri, policia sekuestron motorin që dyshohet se u përdor në rast

17:45 | 22 Qershor 2025
E.H

Rreth orës 22:55 të së shtunës, një incident është raportuar në rrugën “Vëllezërit Gërvalla” në Vushtrri, ku një person i panjohur ka shtënë me armë zjarri në drejtim të një shtëpie dhe më pas është larguar në drejtim të panjohur.

Sipas Policisë së Kosovës, ankuesi ka deklaruar se i dyshuari po drejtonte një motoçikletë me katër rrota gjatë momentit të të shtënave dhe nga ky incident nuk raportohet për persona të lënduar, por vetëm dëme materiale.

“Si rezultat i veprimeve të ndërmarra hetimore hetuesit policor kanë arritur të gjejnë dhe sekuestrojnë motoçikletën (motorin) të cilin dyshohet se i dyshuari e kishte përdorur në veprën penale”, thuhet në njoftimin e policisë.

Sektori Rajonal i Hetimeve në Vushtrri po vijon punën për identifikimin dhe kapjen e të dyshuarit, ndërsa rasti është cilësuar si “Shkaktim i rrezikut të përgjithshëm”./Arbresh.info