Një person ka mbetur i plagosur pasi që është goditur me armë zjarri nga një fqinj i tij.

Rasti ka ndodhur sot në fshatin Dujakë të Komunës së Gjakovës rreth orësh 18:35, rastin për Gazetën Insajderi e ka konfirmuar zëdhënësja e Policisë së Kosovës për rajonin e Gjakovës, Lirije Podrimaj Beqiraj.

Podrimaj ka thënë se rasti është raportuar si tentim vrasje i cili ka ndodhur në mes dy fqinjëve për shkak të një mosmarrëveshe të mëhershme.

“Me datë 31.10.2018 në ora 18:35 policia në Gjakovë ka marr informacion për një rast të shtëna me armë zjarri në fshatin Dujakë. Patrullat policore kanë dal menjëherë në vendin e ngjarjes, aty janë njoftuar se për shkak të një mosmarrëveshje të mëhershme në mes të fqinjëve një person kishte mbetur i plagosur me armë zjarri dhe i njëjti ishte dërguar në Emergjencën e spitalit rajonal ,, Isa Grezda” në Gjakovë”, ka thënë Podrimaj Beqiraj.

Sipas Podrimajt personi i dyshuar është në arrati kurse personi i lënduar është jashtë rrezikut për jetë.

“Policia ka shkuar edhe në Emergjencë ku sipas mjekut kujdestar viktima është jasht rrezikut për jetë. Personi i dyshuar për momentin gjendet në arrati, policia ka arritur të konfiskoj një armë e cila dyshohet se është përdorur për kryerjen e veprës, po ashtu dy persona janë shoqëruar për intervistim në stacion policor. Patrullat policore janë vënë në kërkim të personit të dyshuar”, ka thënë Podrimaj/